सांगली : जिल्ह्यातील आठ विधानसभा मतदारसंघात विधानसभा सार्वत्रिक निवडणूक-2024 साठी दिनांक 20 नोव्हेंबर 2024 रोजी मतदान होत आहे. या निवडणुकीत मतदानाची टक्केवारी वाढविण्यासाठी विविध उपक्रमांव्दारे जिल्हाभर मतदारांमध्ये जनजागृती करण्यात येत आहे.
मागील लोकसभा, विधानसभा निवडणुकीत सरासरीपेक्षा कमी मतदान झालेल्या मतदान केंद्रावर विशेष लक्ष केंद्रीत करून त्या ठिकाणी विविध घटकांचा समावेश करून दिनांक २० नोव्हेंबर २०२४ रोजी मतदान करण्याबाबत जनजागृती करण्यात येत आहे. ज्येष्ठ नागरिक, महिला, नवमतदार, कॉलेज / महाविद्यालयातील विद्यार्थी, विविध आस्थापना, स्वयंसेवी संस्था, बचतगट, अंगणवाडी सेविका आदि सर्वांच्या सहभागाव्दारे लोकशाही बळकटीकरणासाठी सर्व मतदारांनी आपला मतदानाचा हक्क बजावण्याबाबत जनजागृती करण्यात येत आहे. यासाठी सायकल रॅली, रांगोळी स्पर्धा, निबंध स्पर्धा, शाळेतील विद्यार्थ्यांमार्फत त्यांच्या पालकांकडून मतदान करणेबाबतचे संकल्प पत्र घेणे, संवाद यात्रा, मतदार प्रतिज्ञा, घरोघरी भेटीव्दारे मतदार जनजागृती आदी उपक्रम राबविण्यात येत आहेत.
