पंढरपूर : विधानसभा निवडणूक 2024 अंतर्गत भारत निवडणूक आयोगाने नियुक्त केलेले निवडणूक खर्च निरीक्षक के. पी. जेयकर यांनी 252, पंढरपूर विधानसभा मतदार संघातील नियंत्रण व समन्वय कक्षास भेट देऊन कामकाजाची पाहणी केली.
यावेळी पंढरपूर विधानसभा मतदारसंघाचे निवडणूक निर्णय अधिकारी सचिन इथापे,सहाय्यक निवडणूक निर्णय अधिकारी सचिन लंगुटे, मदन जाधव, चरण कोल्हे, आचारसंहिता कक्ष नोडल अधिकारी प्रशांत जाधव, सहा. नोडल अधिकारी सुनील वाळुंजकर, संपर्क अधिकारी बाळासाहेब लांडगे उपस्थित होते.
निवडणूक खर्च निरीक्षक के. पी. जेयकर यांनी आचारसंहिता कक्ष, खर्च नियंत्रण कक्ष, एक खिडकी कक्ष, भरारी पथक, स्थिर सर्वेक्षण, व्हिडिओ पाहणी पथक या कक्षास भेट देऊन कामकाजाचा आढावा घेऊन सूचना केल्या. तसेच चालू असलेल्या निवडणूक कामकाजाबाबत समाधान व्यक्त केले.
निवडणूक कामासाठी नियुक्ती केलेल्या सर्व पथकातील नोडल ऑफिसर यांची बैठक त्यांनी घेतली. बैठकीमध्ये पंढरपूर विधानसभा मतदार संघामधील सर्व निवडणूक कामकाजाचा आढावा घेण्यात आला. त्यानंतर नियुक्त सर्व नोडल अधिकारी यांना निवडणूक खर्च निरीक्षक के. पी. जेयकर यांनी कामकाजाबाबत आवश्यक त्या सूचना दिल्या.
पंढरपूर विधानसभा मतदारसंघांमध्ये यापुढेही निवडणूक खर्च निरीक्षक यांचा पाहणी दौरा चालू राहणार असून, संपूर्ण विधानसभा निवडणुक कालावधीमध्ये निवडणूक खर्च विषयक बाबींवर नियंत्रण ठेवून ते आयोगास वेळोवेळी अहवाल सादर करणार आहेत, अशी माहिती निवडणूक निर्णय अधिकारी सचिन इथापे यांनी दिली. त्याचबरोबर निवडणूक खर्च निरीक्षक यांनी दिलेल्या सूचनांचे काटेकोर पालन करावे, असेही त्यांनी सांगितले.
