आज दि. २१.१०.२०२४ रोजी पोलीस मुख्यालय सांगली येथील शहिद स्मारक येथे पोलीस स्मृतिदिन परेड संपन्न झाली. दिनांक २१ ऑक्टोबर १९५९ या दिवशी लडाख येथे हॉट स्त्रींग या ठिकाणी केंद्रीय राखीव पोलीस दलातील १० शूर शिपायांच्या तुकडीवर चिनी लष्कराच्या सैन्याने पूर्व तयारीनिशी हल्ला केला. त्या १० शुर वीरांनी शत्रुशी निकराची लढत देऊन देशासाठी आपले देह धारातिर्थी ठेवले. तेव्हा पासून २१ ऑक्टोबर हा दिवस देशातील विविध पोलीस दलाचे वतीने पोलीस स्मृती दिन म्हणून पाळला जातो. पोलीस स्मृती दिनाचे दिवशी एकाचवेळी देशातील सर्व पोलीस मुख्यालयाचे ठिकाणी १ सप्टेंबर ते ३१ ऑगस्ट या एका वर्षाचे कालावधीत ज्या पोलीस अधिकारी व अंमलदारांना आपले कर्तव्य बजावत असताना वीर मरण आले त्या सर्वांना आदरांजली वाहन्यात येते. दिनांक १ सप्टेंबर २०२३ ते ३१ ऑगस्ट २०२४ या कालावधीत देशातील सर्व राज्यातून एकूण २१४ पोलीस अधिकारी व अंमलदार यांनी आपले कर्तव्य बजावत असताना देह धारातिर्थी ठेवले. या सर्व पोलीस हुतात्म्याना आज देशवासीयांतर्फे आदरांजली अर्पण करण्यात आली. सदर परेडचे नेतृत्व श्री बाळासाहेब आलदर राखीव पोलीस निरीक्षक पोलीस मुख्यालय सांगली यांनी केले. सदर परेडमध्ये ३० पोलीस अंमलदारांचे सशस्त्र पोलीस पथक सहभागी झाले होते. सदर पथकाने परेडच्यावेळी हवेमध्ये ०३ वेळा फायर करुन शहिदांना मानवंदना दिली.सदर कार्यक्रमाचे प्रमुख पाहुणे म्हणून मा. श्री. संदीप घुगे, पोलीस अधीक्षक साो सांगली हे उपस्थित होते. तसेच श्रीमती रितू खोखर, अपर पोलीस अधीक्षक साो सांगली, श्रीमती विमला एम उपविभागिय पोलीस अधिकारी शहर विभाग, श्री प्रणील गिल्डा, उप- विभागिय पोलीस अधिकारी मिरज विभाग, श्री दादासो चुडाप्पा, पोलीस उप-अधीक्षक मुख्यालय हे उपस्थित होते. तसेच सदर कार्यक्रमासाठी अन्य पोलीस अधिकारी, पोलीस अंमलदार, होमगार्ड प्रशिक्षणार्थी व मंत्रालयीन स्टाफ हजर होते. सदर कार्यक्रमाचे सुत्रसंचलन ‘पोउपनि बाळासाहेब माळी (सेनि) यांनी केले. सदर कार्यक्रमामध्ये शहिदांच्या नावाचे वाचन श्रीमती कविता नाईक सहाय्यक पोलीस निरीक्षक विश्रामबाग पोलीस ठाणे, श्रीमती तेजस्वीनी पाटील पोलीस उपनिरीक्षक सांगली शहर पोलीस ठाणे व श्रीमती सपना अडसुळ पोलीस उपनिरीक्षक मिरज शहर पोलीस ठाणे यांनी केले.
