सांगली जिल्ह्यात दि. 10 नोव्हेंबर 2024 रोजी महाराष्ट्र शिक्षक पात्रता परीक्षा (महाटीईटी) 2024 सांगली व मिरज शहरातील एकूण 16 परीक्षा केंद्रांवर घेण्यात येणार आहे. परीक्षा केंद्राच्या ठिकाणी शांतता व सुव्यवस्था राखण्याच्या दृष्टीने जिल्हाधिकारी तथा जिल्हादंडाधिकारी डॉ. राजा दयानिधी यांनी परीक्षा केंद्राच्या ठिकाणी इमारतीपासून 100 मीटर सभोवतालच्या परिसरात दिनांक 10 नोव्हेंबर 2024 रोजी सकाळी 8 वाजल्यापासून ते सायंकाळी 6 वाजेपर्यंत भारतीय नागरिक सुरक्षा संहिता 2023 चे कलम 163 लागू केले असल्याचे आदेश निर्गमित केले आहेत.
आदेशात म्हटले आहे, परीक्षा वेळेत परीक्षेसंबंधी अधिकारी / कर्मचारी व परीक्षेस येणारे विद्यार्थी तसेच त्यांचे लेखनिक वगळता इतर कोणत्याही चार किंवा त्यापेक्षा जास्त व्यक्तींना परीक्षा केंद्राच्या ठिकाणी फिरण्यास, एकत्रित गटागटाने फिरणे व उभा राहण्यास मनाई केली आहे. तसेच परिक्षा वेळेत परिक्षा केंद्राच्या परिसरातील झेरॉक्स मशिन, पब्लिक टेलिफोन बुथ, फॅक्स मशिन, ध्वनीक्षेपक यांचा परिक्षा संदर्भात कोणत्याही गैरप्रकारासाठी वापरण्यास मनाई केली असून परिक्षा केंद्रात विद्यार्थी तसेच त्यांचे लेखनिक यांना मोबाईल, पेजर, ब्लूटूथ, वायफाय डिव्हाईस, डिजिटल कॅमेरा, स्मार्ट वॉच, इलेक्ट्रॉनिक डिव्हाईस व डिजिटल डिव्हाईस इत्यादी नेण्यास मनाई केली आहे.
ही परीक्षा शिक्षणमहर्षी डॉ. बापूजी साळुंखे महाविद्यालय मिरज, कै. ग.रा. पुरोहित कन्या प्रशाला सांगली, न्यू इंग्लिश स्कूल मिरज, मिरज महाविद्यालय मिरज, जवाहर हायस्कूल ॲण्ड ज्युनि. कॉलेज मिरज, सिटी हायस्कूल सांगली, विलिंग्डन कॉलेज सांगली, सांगली हायस्कूल ॲण्ड विनोद शिवाजी भाटे आर्ट, सायन्स ॲण्ड कॉमर्स ज्युनि. कॉलेज सांगली, डॉ. पतंगराव कदम महाविद्यालय सांगलीवाडी, पटवर्धन हायस्कूल सांगली, श्रीमती राजमती नेमगोंडा पाटील गर्ल्स हायस्कूल सांगली, श्रीराम रामदयाल मालू हायस्कूल सांगली, गणपतराव आरवाडे हायस्कूल ॲण्ड ज्युनि. कॉलेज सागली, ज्युबिली इंग्रजी कन्याशाळा मिरज, कन्या महाविद्यालय मिरज, राणी सरस्वती कन्या प्रशाला सांगली या परीक्षा केंद्रावर घेण्यात येणार आहे.
हा आदेश कायदेशिर कर्तव्य बजावित असलेल्या शासकीय कर्मचाऱ्यांना व धार्मिक विधी यांना लागू राहणार नाही, असे आदेश जिल्हाधिकारी डॉ. राजा दयानिधी यांनी जारी केले आहेत.
